من طرف نسمة الهواء الخميس أغسطس 12, 2010 11:32 pm
الـبآرت السادس::
وعند بتول الي كانت تكنس الغرفة اللي صايرة مظلمة مسوا الستاير كنست وهي جاية بتشيل الواير انتبهت لقروص ابو زنة يتحرك ورايح ورى الكنب مسكت المكنسة الكهربائية وحركتها ورفعت العصاية حقتها وهي بعدهي ورى الكنب <<كله مسوا الخوف ماتقوى على الشراريص حدها تقتلهم ومن بعدي يابفليت يابعصاية
رفعتها وضربت بأكبر قوة في المكانه الي تخيلت ان ابو زنه فيها لكنها فجأة سمعت
صوت صراخ من ورى الكنب :
-آآآآآآآآآآآآآآآآآآآه
اختلعت بتول من الصرخة ورجعت على ورى وشافت يوسف يقوم من قدامها من ورى الكنب شافته يطلع عليها بقهر وركض ليها ومشع شعرها وقال :
-انتين هبلة ؟ ماتشوفي ياحمارة ؟
قالت وهي تتألم وخايفة منه لانها صادته :
-آآه اني كنت امبا اقتل ابو زنة
-ابو زنة في عينش ياكلبة
-علي هدني والله ماكنت ادري
-علشان تتأدبي وتطلعي
-ويش منيمنك هنا ؟ هدا مو ذنبي
-والله انام وين ماامبا ومالش دخل
عطاها صطار طيحها على الكنب وطلع وهو مقهور اما هي صاحت لان ماكانت تمبى تكنس اصلن بس امها حنت عليها قامت من مكانها وراحت لغرفتها وفي طريقها قابلت مروى اللي نازلة مع لجين قالت ليها :
-بتولو ويش فيش لاوي حالتش حالة
بعدت بتول مروى عن طريقها وراحت غرفتها اما مروى طلعت عليها باستغراب من تصرفها ونزلت ويا لجين اللي قالت ليها :
-اوف اليوم كان المفروض اتجي ليي وتينو بس طاحت وانكسرت ريولها وبتولو معفنه اخلاقها مادري ويش صاير ليها
-الله يعين
-أي
-امشي بس انشاهد لينا فلم ونروق روحنا
-يالله
راحوا سوا للصالة وقعدوا يشاهدوا وبعد ساعة قامت مروى بتشرب ماي وشافوا يوسف طاير لفوق وباين عليه القهر حتى صقع في مروى الي قالت :
-شوي شوي يااهبل انتبه
لكنه مارد عليها فقالت لجين :
-ول!حتى هادا اخلاقه زفت
-ايي هو متى صارت اخلاقه حليوة كلا فاشلة
ركب لغرفة بتول وطق الباب وهي تصيح قالت :
-من ؟
-قال ليها بصراخ:
-افتحي
-ويش تمبى ؟
-انا قلت ليش افتحي ها
خافت بتول يزيد صراخه فقامت وفتحت الباب دخل وهو يقول :
-كل شي توقعته منش الا هدا الشي
-عن ويش تتكلم ها ؟
-عن ويش ياحمارة ياللي احين بعيد تربيتش
مسكها وضربها ضرب قوي وهي تحاول تدافع عن نفسها قال ليها :
-اجل تروحي الراشد ياصيعة ها ومن ورانا ولابعد شفتي الحبيب
انصدمت وقالت :
-من قال ؟
قال ليها باستهزاء:
-من قال ها ؟ انا اقولش احين
طلع جواله وحط على مقطع فيديو وحطه قدام عواينها وكان مقطع بندر وهي قدامه تفاجأت بس الصوت ماكان واضح مسوا ازعاج في المحل انتهى المقطع وسحب يوسف شعرها وقال :
-من هدا ياكلبة ؟ من هو ؟
صرخت بتول :
-ماعرفه
عطاها يوسف صطار وقال :
-بعد تصرخي ياام لسان قولي دامن هو والا دفنتش في غرفتش
-ادفني يالله ادفني خلني افتك من هالعيشة يالله فكني منك ومن هالبيت
-وتفكريني بخليش
صار يضربها بقوة لين طاحت على الطاولة وطاحت المزهرية الا عليها وانكسرت وطلع صوتها عال وحتى نظارتها طاحت وانكسرت فسمعوا لجين ومروى وركبو بسرعة وفتحوا الباب وشافوا بتول طيحة على الارض والدم ينزل من راسها وبوزها قالت مروى بصراخ :
-ويش صاير ؟
قال يوسف :
-اطلعي برا ها ومالش دخل
-لا لي دخل ويش فيها بتول
-مروو اطلعي لاتصيري زيها
-ماني طالعة هدي اختي ها
-قلت لش مالش دخل اطلعي
-ماني طالعة لوويش
راحت عند بتول وقعدت وقالت ليه :
-ولاوي ضربتها ؟
-لانها تستاهل وتستاهل الموت بعد
-بقول حق ابويي ها
-اذا فيش خير قولي خله يعرف بته المصون ويش تسوي من وراه
دارت مروى لبتول وقالت :
-بتول وش يقول هدا ويش سويتي
ماجاوبت بتول لانها بعدهي منصدمة اليوم ضربها مرتين بس مايهمها الا تعرف من وين له هالمقطع قالت مروى ليه :
-يوسفو وش سوت فهمنا
جاوبها :
-اختش ريحة الراشد تقابل حبيبها
انصدمت مروى وقالت:
-شداب ! مستحيل ومتى ومن قال
-توها امس ومايهمش من قال المهم انهم جابو ليي دليل
دارت مروى عليها وقالت :
-بتول صحيح هالكلام؟
قالت بتول وهي تغمض عواينها :
-صحيح نصه
فتحت عواينها مروى ولجين الا كانت عند الباب وقالت مروى :
-ليش ؟ ومع من رحتي ؟
صرخت بتول :
-لاني اطفشت من هالحياة اطفشت واني احس بنفسي طرطورة وقت مايتكلموا
صديقاتي عن الماركات والاسواق طفشت واني اشوف كيف محبوسين وحدنا خارج خلاص زهقت وكرهت حياتي
-انزين بتول كلنا هلون
قال يوسف :
-لاياقلبي اتين مارحتي علشان كده ريحة لحبيب القلب لكن والله العظيم اذا تطلعي
من هالبيت بعد هاللحظة والله اني اكسرش زي نظارتش
طلع وصفق الباب وراه اما هي صاحت وجنبها مروى الا ضمتها وتقربت منهم لجين وقعدت قدامها وتحاول تواسيها .
وعند حورء الي كانت قاعدة مع وتين بعدما راحت كوثر جت ليها امها الي جالسة مع ام سارة في المجلس وقالت :
-حوراء ام هيثم تمبا العقد والحفلة بعد بكرة
وقفت حوراء وقالت :
-خير خير ويش تمبى ؟ اني موفاضية اليها
-اسمعي المرة محصلة ليها خوش حملة وتمبى تروح فيها وبتكون بعد اليوم الي
تمبى فيه الخطوبة
-اني مايلقفني فيها ها ! يعني تمباه ايام مدارس وبعد مايمديني اجهز
-مومشكلة بالنسبة للمدرسة غيبي اليوم الي بعده وبعدين ع التجهز روحي بكرا واشتري كلها فستان وحجز كوافيرة
-لا امبا صالة الصفا بعد
-هدي حفلة خطوبة والاعرس حتى تمبي الصفا
-اني هادا شرطي امبا اكون زي البنات يسوو حفلاتهم في صالات ماني انقص عنهم
-انزين فكينا حتى هادي تنحجز من اليوم
-أي بس اني مامبا ورى بكرة
-عن الدلع عا وبروح اقوليها ان موافقين
قالت وتين :
-اماه استني نسيتي ان ريولي ريحة فيها كيف ارقص
-واني هادا الا امباه علشان تفكينا من رقصش الماصخ
-علي لا حرام عليش
-لاكده احسن وبعدين خلاص قلت ورى بكرة يعني ورى بكرة واني الا اقرر
تأففت حوراء وامها راحت المجلس ووتين قالت :
-اني اقول اروح انام احسن ليي
-قومي فكينا
-ئه! اعصابش ترى انا قلبي بيتكسر مية حته
افضل في مكاني .. انشاالله لسته الصبح بفكر فيك
-انتين ولاخير وياش ويا هالاغاني ها
-والله ماقدر اهون وحشني راشد
-الله يعقلش بس
قامت حوراء وراحت غرفتها اما ونامت اما وتين ظلت تشاهد تحت وهونت عن النوم لانها اليوم اللي بعده مابتروح المدرسة علشان ريولها فحبت تسهر .
وبعد يوم مضى بتعب على حوراء وكوثر الي دارو مارينا مول كله يدوروا فستان ويحجزوا كوافيرة للخطوبة جا يوم خطوبة حوراء وكانت قاعدة عند الكوافيرة في مشغل ريماس الاهي عيدة وبتبدي فيها وجنبها كوثر حطت عيدة المشط في شعر حوراء وحاولت اتمشطه بعدين قالت :
-من متى مافي مشت (مشط) شعر انت
تفشلت حوراء وقالت :
-مادري
-لازم في مشت هزا شعر
-انزين ماعليه
ضحكت كوثر وكملت عيدة شغلها وبعد ثلاث ساعات كانوا جاهزين كوثر بطلتها الجميلة لابسة فستان اخضر ومستشورة شعرها ومخلتنه مفلول وحاطة ليها مكياج خفيف اما حوراء فكانت لابسة فستان بنفسجي فيه خيوط على رقبتها ومسوية شعرها تسريحة وفيه شوي خصلات نازلة ومفيرة ومكياجها بعد ناعم من اختيار كوثر طلعوامن المشغل وراحوا بيتهم وهناك كانت وتين راحت ليها كوثر وصارت تعدلها لانها مارضت تروح المشغل وهي بهدي الحالة !
اما عند مروى ولجين كانوا يتعدلوا ويتشيكوا وبتول فوق رافضة تطلع من غرفتها وماتبى تروح والاهل لحين مايدرو وش الموضوع لبست مروى بدي اصفر وبرمودا ابيض وحطت ع راسها قبعة بيضا ومكياج بدرجات الاصفر الفاتح ولجين لابسة فستان وردي قصير ومسوية شعرها ع جنب ومستشورتنه وماحطت ليها مكياج ولما صار الليل كانت حوراء قاعدة قبال الشيخ يوسف هي وكوثر تنطق بالموافقة قال ليها :
-اتقبلين بهيثم محمد الـ--- زوجا لكِ؟
قالت وهي تسوي حالها خجلانه مع انها في الداخل بعدهي مي حاسة بشي :
-نعم
-وهل لك اية شروط؟
-لا
-وقعي هنا
مسكت حوراء الدفتر ووقعت وقام هو وطلع وهي وكوثر بعد طلعوا وراحوا الصالة الا ماكان فيها احد قالت حوراء لامها الي شافتها عابرة :
-اماه ويش احين متى بنروح الصالة ؟
-اصبري شويه احين بجي يوسف وبوصلنا
-ئه ! مانقيتو الاهادا يوصلنا اوف
-وش فيه يعني ؟
-ماحبه ماشتهيه هو وياشعره الي طول الوقت قاعد ويزبط فيه
-والله انه جميل وشعره ناعم ولاتقعدي تستغيبي الولد ها
-انزين بسكت ووتينو وينهي ؟
-مادري عنها يمكن قدام التلفزيون زهقت وهي اتانيكم
-ابويي والرجال في الميلس له ؟
-اييي هناك وش فيش الشيخ توه طالع من عندش يعني وين بروح ؟
-أي انزين بروح اجيب بشتي
قالت كوثر :
-وجيبي عبايتي او بشتي ع قولتش وياش
-انزين
ركبت حوراء فوق ونزلت العبايات ووقفت عند كوثر وعطتها بشتها الا كانت راس ومحتشمة ومافيها أي زخارف اما حوراء كتف وفيها زخرفة على طرف الكم لبسو عبيهم وراحوا لوتين في غرفة الجلوس كانت قاعدة وتطلع على اغنية مشتاقلك موت لاحمد الهرمي ومن شافتهم غيرت بسرعة قالت ليها حوراء:
-وتينو اعترفي ويش تشاهدي ها ؟
-ولاحاجة ماتشوفي المسلسل المصري قدامش له
طلعت حوراء على المسلسل وقالت :
-يحبيبتي اعرف انش شدابة لان انتين ماتشاهدي المصاروة الا اذا كان وياهم حسين فهمي وهدا المسلسل صار ليي سبعين مرة اشاهده واعرف انه موفيه فقولي ويشو تشاهدي احسن لش والا اقول حق امي
-خلاص والله بقوليش بس ماتقولي لاحد لاامي ولاابويي
-يلا عندش خمس دقايق بس
-اشاهد فيديو اغنية مشتاقلك موت لاحمد الهرمي
-يؤؤؤ!! اتين هبلة ئه ؟ لحين ماتوبي
-يعني ويش تمبيني اسوي ها ؟ ماقوى ع فراق راشد واحمد وعبد المجيد ويارا والشلة كلهم هدولا اصدقائي الاوفياء كلما زعلت ماالاقي غيرهم اهونو عليي الجروح ولايروحو ابدا كلما احتجتهم بس سويت اعادة لاغانيهم ويجو مسرعين
-علي ماقدر ع القصة الحزينة قطعتي قلبي
قالت كوثر:
-وتين يحبيبتي ياعمري ترا الاغاني حرام
قالت وتين بقهر:
-لا موحرام وش صراحة الواحد مايقدر يعيش اني اتمنى ان راشد اجي ويخطبني علطول بوافق من دون مهر حتى بخد ليي بس شنطة صغيرة فيها بطاطس نسمة لاني مابجي هنا مرة ثانية حتى في الحلوعاد
قالت حوراء:
-علي ماقدر ع الاحلام الوردية اقول لايكثر بس
-اوف انتين مايقدر الواحد يسولف وياش في حاجة
-اقول البسي بشتش الا جنبش احين بجي يوسفوه بياخدنا
-يؤ! لاوي يعني ؟
-وش الا الاوي؟
-يوسفوا هو الابياخدنا ؟
-يعني اتين هبلة ئه ؟ شيفة عندنا مية سواق ماعندنا حتى اخو يودينا فمافي الا هالعلة
-انزين اتين ولاوي تسبيه احين ؟
-اوو اسفة نسيت انه حبيب القلب
عصبت وتين ومسكت علبة الكلينكس وحدفتها على حوراء الي صرخت وقالت :
-آه ولاوي تحدفيها ياحمارة
-احسن تستاهلي هدي المرة الالف الا افهمش فيها ان يوسف مجرد اخ وصديق واني لو تنقلب الكرة الارضية وتصير امريكا مكان السعودية مابخده ماتفهمي له ؟
-انزين خلاص فهمت بس مرة ثانية لاتحدفي عليي شي
جت وتين بتتكلم لكنها سمعت صوت امها تناديهم :
-حوراء وتين وكوثر يلا تعالو وصل يوسف
راحت حوراء وهي تقول :
-الله يعين احين بشوف وجه سارو القشرة
قالت وتين :
-أي والله هالسبالة ماقوى عليها وخصوصن لما تقول لامها مامي علي سخيفة ودي احرقها بحريقة ماتنطفي
-ول ! كل هدا حقد ؟
-أي واكثر بعد مادري كيف يعني موعلشانش بس احس ماني طيقتنها
قالت كوثر:
-احين خلو النقاش ويلا نطلع
لبست وتين عبايتها وطلعوا كلهم وركبوا السيارة وسلموا على يوسف الا خاب السيارة من ريحة عطره القوية صح انها خنينة بس مرة قوية قالت حوراء لكوثر بهمس:
-علي دهتني الليلة بزوع ع هيثمو
-ول !! وش هالكلام وبعدين مايقولو بازوع يقولو باقدف او بارجع
-اوف فكينا الله يخليش اصلن كلهم معناهم واحد وبعدين مومهم الكلمة المهم وش بصير
-انزين ولاوي يعني تحسي بهدا الشعور؟
-مادري كيفا هالعطر ولافليت ريحته جميلة بس ابد ماني قاوية عليه قوي
-الا بالله خنين وعادي
-مالومش اتين عايشة في ايران وشامة ريحة الخياس هناك فاحين هدي الريحة تعتبر عندش ريحة الجنة
-ههههه الله يقلع بليسش
-والله اقول الحقيقة
-انزين ههه
-الاباقوليش
-وشو ؟
-احين بس نروح خلي سلامو تدخل ليي الغرفة امباها تقعد ويايي
-من وين اقعد ادورها لش
-ئه! هي تنشاف لانها قمر وسط سحالي
-علي !! ومنهم السحالي
-طبعن عيلة سارو لان احنا ماعزمنا ناس واجد وكلهم تعرفيهم
-علي حرام عليش تقولي هلون لاتستغيبيهم اكو ريلش منهم
-أي هدي المشكلة الله يستر كان مايطلع زيهم قلت لحق امي امبا صورته قالت ليي بلا صور بلا خرابيط شوفيه ع الطبيعة ماتدري اني ماحب المفاجآت واخاف انصدم ويغمى عليي
-لا انشالله بيكون جميل
-اني اتوقع بيطلع عادي يعني زي اخته لانها موجميلة واجد
-الله اعلم
وصلت السيارة ونزلوا كلهم وساعد يوسف ام حوراء ع ان يجلسوا وتين على الكرسي ودخلوا بعدين الصالة وحوراء علطول لغرفة العروس هي وكوثر اما وتين راحت داخل الصالة وياامها قعدت حوراء وحطت ريول فوق ريول واخدت ليها من صحن المكسرات الا قدامها حب وصارت تفسفس قالت ليها كوثر :
-علي !! انتين عروس ئه ؟ والله الا يشوفش مايصدق حب وريول فوق ريول
-والله اني يوعانه وماعرف اقعد غير عن كده
-واليوعان ياكل حب
-أي وش شايفة في غير ليكون في بوفيه واني ماشوفه
-لا بس بعدين هيثم بياخدش المطعم
-لايحبيبتي مابيوديني الا كل مت من اليوع احسن لي اكل واطفي اصوات اليوع الي طالعة من بطني
-اكلي وش عليي منش
-روحي شوفي سلامو
-والله اني مستغربة !
-من ؟
-يعني طلبتي صديقتش ولاطلبتي وحده من نسباش مثلا بتول او مروى او مادري وش اسمها الثالثة
-عادي لاني اشوف سلامو اكثر منهم ومتعودة عليها
-اهااا اجل بروح اشوفها
-انزين بس لاتتاخري
-اوكي
طلعت كوثر للصالة وسكرت الباب وراها وصارت تدور بين الطاولات وتسلم ع الي تعرفهم وتدور ع سلام ولمن وصلت عندها قالت ليها بعدما سلمت عليها :
-سلام ، حوراء تمباش في الغرفة
-اخيرن جت
-ايي يلا تعالي اوديش
-يلا
مشوا ثنتينهم وفي طريقهم لمحت كوثر بتول وامها ومروى واختهم لجين وقفت وسلمت عليهم قالت ليها مروى :
-واااااو من زمان ماشفناش مرة اتغيرتي
ردت عليها كوثر وهي تضحك :
-للاحسن والا الاسوء<<يعني وش رايش ؟ بتقولش مثلا للاسوء وانتين ماتقربي ليها !
-اكييد للاحسن
-تسلمي
-الله يسلمش
-الا اشوف بتول ساكته مو من عادتها بالعادة كلا مفرفشة
-والله ماكانت تمبى تجي بس امي حنت عليها وجت
-يؤ ! لاوي؟
-كانت تعبانه شوي
-ياعمري الله يعافيها
-عافاش الله
-يلا اني احين استأذن
-اوكي
تحركت كوثر مع سلام وراحو الغرفة ولمن دخلو صفرت سلام وقعدت جنب حوراء وقالت :
-مرة تجنني عسل وربي
ابتسمت حوراء وقالت :
-ادري من زمان
-اهم شي الثقة
-هههه أي اعطيش منها اذا تحبي
-لاعندي منها الايكفيني ويزيد
-شفتي سارو ؟
-أي دكي لابسة اسود ومسوية شعرها عكرش ونافش ع حده وتمشي بدلاعة ماليها حدود
-علي ياكافي الشر ! من احين تفول علينا بالشر اسود في خطوبة وش هالمزاج الخايس ؟ ياربي الهمني الصبر بس
-أي وماخلت احد في المدرسة ماعزمته اظنها كانت بتعزم حتى الا يشيلو الزبالة الا
حوالي المدرسة من الدرام دولا حق البلدية
-ول! اني في ناس ماحبهم ويمكن هي عزمتهم الله يستر
-أي في هنا موزة الاماراتية الا تدرس ويانا
-علي! ياشين الحظ بس ماقوى عليها هدي وخصوصن لمن تقول (شو هاي الرمسة ) علي اموت
-أي وعزمت مي المصرية بعد
-يؤؤ من صجها هدي عازمة كل الناس
-ايي لاتنسي انهم صديقاتها وماحد يتحمل دلاعتها غيرهم
-علي ماكأنها حفلتي لكن اتشوف هالحمارة عرسي مابخليها تدخله بخلي كل الشغالات يدخلوا الاهي كلما جت بتدخل الحارس يوقف فوجهها
-ماتقدري اخوها دا
-الا اقدر هو عرسي والا عرسها وبعدين ادا اخوها يمباها تنقلع وياه ويسوو عرس لحالهم
-احين تقولي كده بعدين تتعودي عليه وتحبيه له وتقولي هيثمي قال اخته لازم تحضر يعني لازم
-يؤؤ ! لا مستحيل
-صدقيني بيصير هلون
-اقول انشبي احين ولاتخلينا نفكر في المستقبل
-انتين الافكرتي ياحظي وقلتي عرسي
-أي كنت غلطانة احين اتين فكري بس فوش بيصير احين
-عادي بتدخلي وبتمشي ع الكوشة وبتوصلي وبتقعدي وخلاص وبعدين بيودوش له
-الله يعين
انفتح الباب وجت المصورة الي تابع استديو رناد وصارت تصور حوراء لحالها وبعدما خلصت قالت كوثر:
-يلا احين اطلعي للناس
حست حوراء بالخوف والتوتر والخجل وقالت :
-احين ؟
-أي اجل متى
-علي كنه منحين
-هبلة اتين الساعة عشر وربع
-انزين
قامت حوراء مع كوثر الا قالت لسلام اتقول للطقاقة انها بتدخل ولمن حسوا الوقت مناسب طلعوا للصالة وتركت كوثر يد حوراء الي ركبت ع الممر حق الكوشة وصارت تمشي والمصورة تصورها فيديو والطقاقة تغني لا اله الا الله ولمن وصلت حوراء ركبو ليها البنات كوثر ومروى ولجين اما وتين ظلت تحت لانها ماتقدر بس قريبة منهم وبتول رفضت تقوم من مكانها رغم حنة امها عليها وصارو البنات يرقصوا وحوراء بس تطلع على سارة كيف ترقص بدلع وتبغى تقوم وتحدفها من فوق الكوشة ! مضى الوقت بسرعة وقامت حوراء من الكوشة وجلست في غرفة العروس وجا وقت دخول هيثم احين هي خلاص ماتت من الحيا صحيح انها دفشة بس عروس ولازم تستحي دخل وامه تولول وجلس جنبها وهي تطلع على الارض صار يلبسها وهي ماتطلع عليه ابدا والمصورة تصور بعدين طلعوا النسوان الاهم اهل حوراء واهل هيثم وظلوا لحالهم فصورتهم المصورة صور قليلة برغبة حوراء وكلما تجي حركة فيها ان حوراء ترفع راسها ليه ماترضى تصورها يعني كل صورها صورتهم وهي تطلع على اشياء مختلفة الا هو ماشافته للحين ! طلعت المصورة وقعدت هي معاه فقال ليها :
-قومي البسي عبايتش بنروح المطعم
انقهرت في داخلها انه يتامر ولا قاعد ياخد شورها بس قامت لانها يوعانه ولبست عبايتها وطلعت معاه وصارت تمشي وراه وهي بس تطلع على رجوله من تحت وين يروح ركبت السيارة ورى قال ليها :
-تعالي قدام شدعوة انا خطيبش احين
قالت:
-لا كده احسن ليي
-لالا مي عدلة هلون تقعدي ورا تعاليي
قامت وقعدت قدام جنبه وراحوا مطعم فيروزي نزلوا وقعدوا في احدى الطاولات وهي بعدهي تطلع ع الارض ! قال ليها :
-وش فيش تطلعي على الارض كله ؟ وماشلتي النقاب
قالت وهي متفشلة :
-لا ماطلع ع الارض بس اطلع على اشياء ثانية والنقاب بشيله
-انزين ارفعي راسش مايصلح هلون بتنكسر رقبتش وانتين منزلتنها
رفعت راسها حوراء بصعوبة وفي داخلها تمبى تطلع عليه كيف شكله حاولت
وحاولت وقالت بتطلع فيه بس نظرة وبتسوي حالها كانها تطلع على كل شي لكنها وبس شافته ظلت فترة تطلع عليه وفتحت عواينها بدهشة وهي لحين لابسة النقاب شوي الاهي صرخت فجأة وقالت:
-وعععع
طلع عليها وقال بصدمة :
-وش الا وع ؟
حست ع عمرها وقالت تصرف:
-لابس شفت وزغة مرت على الطوف الا وراك
-يؤؤؤ !! انا علمي بهالمطعم نظيف كيف ؟
ابتسمت له حوراء وفي داخلها حريقة شابة وهي تطلع عليه كيف شكله ماعجبها ابد
][هيثم :شاب عمره 22 سنة توه متخرج واشتغل في شركة ارامكو بالواسطة يعني ،موجميل ولاقبيح مرة اسمر وسمرته غامقة شوي لانه شغله يتطلب منه انه يطلع في الشمس واجد وهو من قبل اسمر فزاد وطويل وجسمه مملي شوي مو دبدوب لكن مو ضعيف ][
قالت حوراء بهمس :
-حريقة وش هالشيفة ! علي كيف بكل بس ؟
قال ليها وهو يشوف نظراتها الي كانت قبل شوي خجولة كيف تغيرت :
-وش فيش اذا موعاجبنش المطعم ترا عادي انغيره
قالت :
-لا مايحتاج عادي
-متأكدة ؟
-ايييه
-انزين شوفي ويش تمبي من القائمة
مسكت حوراء القائمة وصارت تطلع وهي تفكر متى بس تفتك من وجهه وكيف بتتحمله وكيف بتكون نظرة الناس ليه وانه خطيبها هي الا بتتفشل <<هدا اهم شي عند البنت
قالت :
-عادي أي شي
-ئه ! اختاري اتين دكو عندش القائمة
-لااختار لي على كيفك
-يمكن مايعجبش
-لا بيعجبني انشالله
قام من مكانه بيطلب وهو يفكر فيها كيف تغيرت فجأة وصارت عادي تكلمه ! طلب ورجع وشافها حاطة راسها ع الطاولة جلس قبالها وصار يطلع على كل شي حوله وهو مايكلمها وحلت فترة سكوت بينهم !
وعند بتول الا كانت في الحمام الي في الطابق التحتي وماحد موجود والمكان ظلمة كانت تمسح المكياج الي فوجهها وتفك شعرها من التسريحة البسيطة الا سوتها لها مروى وتشيل عدساتها الطبية الا باللون العسلي سمعت صوت فتح الباب واحد يتكلم طلعت من الحمام وهي تمشي بشويشوي ووقفت ورى الجدار وطلعت الا هو يوسف وكان قاعد ع الكنبة ويكلم في جواله سمعته يقول :
-ايي هالكلبة والله انا مو يوسف اذا ماعلمها من اكون اجل تتمسخر عليي وع تربية بيتنا صح ان اختي غلطانه بس مارضى تتكلم ع بيتنا وتربية اهلي وبعدين تشوف تربيتها اول بنت ماصخة سخيفة وبعد دلوعة والقهر اسمها حسناء من وين ليها الحسن لاشكل ولااخلاق !
انتفضت بتول في مكانها وهي تسمع كلامه وسمعته يكمل ويقول :
- ------
الرئيسية![][كلما قلت احبكـ طابت جروحي ][ بقلمي - صفحة 2 Vote_rcap1](https://2img.net/i/fa/m/vote_rcap1.gif){kind=small}
![][كلما قلت احبكـ طابت جروحي ][ بقلمي - صفحة 2 Vote_lcap1](https://2img.net/i/fa/m/vote_lcap1.gif){kind=small}
[100%] 
![][كلما قلت احبكـ طابت جروحي ][ بقلمي - صفحة 2 728372](/users/1213/22/17/56/smiles/728372.gif)